سينما 2011 - الجزء الأول

خلصت 2011

ماكنتش ناوية أكتب عن الأفلام بتاعت 2011 غير لما أشوف شوية كمان من الأفلام، خصوصًا الشوية الأخرانين اللي نزلوا في الكريسماس، بس معلش ... هانمشيه حصاد مؤقت قابل للتعديل إن شاء الله بمجرد ما أشوف الباقيين...

 و لأن رقم عشرة حلو فأنا هاكتفي بأفضل عشر أفلام من وجهة نظري الغير موضوعية:

1 –  The Ides of March

و مش علشان أنا متحيّزة لرايان جوسلينج .. آبسلوتلي .. الفكرة إن الفيلم ببساطة جمع بين الفكرة اللي تشدني، بدماغ جورج كلوني عن السياسة و قذارتها، و بين كاست تحفة ! يعني فيليب سايمر هوفمان و بول جياماتي الاتنين رغم صغر مساحة أدوارهم بس كانوا فظاع !! تحفة فعلاً !! و رايان جوسلينج أداءه كان عالي جداً في الفيلم ده .. فيه مشهد قرب النهاية و هو في عربيته : رهييب
فعلاً الفيلم عجبني و اديتله 8/10 بسهولة

2 –  Warrior

و رغم إني المفترض بنت رقيقة، لكن ماقدرتش أقول للفيلم العنيف ده لأ .. جايز لأنه فيه قدر عالي من الإنسانيات، و جايز لأن توم هاردي عرف يكتم مشاعره كويس في الفيلم فده خلاني أتعاطف بشكل مرعب معاه !
الفيلم مش عن الرياضة و لا المصارعة و لا الجو الدموي ده خالص، لكنه ببساطة عن العائلة و كل حاجة فيه كانت تشد، الإضاءة بالذات كان ليها جو مختلف..
و برضه أخد 8/10

3 –  Drive

هنا بقى أنا متحيّزة لرايان جوسلينج .. في واقع الأمر كون إني أختار التلات أفلام اللي هو عملهم في 2011 – لسه التالت تحت – من أحسن عشر أفلام فده يوضّح تماماً إني متحيّزة، بس عادي أنا حرة بقى !
الفيلم ده فيه سوداوية مش لطيفة ! يعني مش هايمشي مع كل الناس.. جو غامض كده و كئيب، مزيكا بوب سبعينياتية و الشخصية الرئيسية مجهولة الاسم، خط رومانسي غامض ماتفهموش، و نهاية كلها دم ! من الآخر إحتمالية تقبلك للفيلم 50/50 .. و إحنا و نصيبنا و ماتجيش تعترض؛ أنا حذرتك..
7/10

4 – Contagion

لو كنت متصوّر إنه فيلم خيال علمي على حركات زي Outbreak تبقى غلطان .. الفيلم أقرب لصورة نهاية العالم بعد تفشي وباء قاتل.. ممكن يفكرنا شوية بـ Blindness  و تعامل الناس مع الوضع. الفيلم إنساني في المقام الأول، كل شخصية عملت اللي عليها زي الفل، و فيه شخصيات كان دورها صغير و غريب لدرجة تصدمك.. بس مافيش حاجة بعيدة أو غريبة مع ستيفن سودربيرج..
الفيلم ممتع، سوداوي برضه شوية – مرض و ناس بتموت – و منطقي برضه، بيخليكي تفكر هاتعمل إيه و دماغك هاتفكر إزاي في ظروف زي كده..
بكل أمانة ياخد 7/10

5 –  X-Men : First Class

بصراحة ماكنتش متخيّلة يومًا إني هاحط حاجة من إكس مين كأحسن فيلم أشوفه، بس الجديد فيه حاجة مختلفة !
مجدداً ده مش تحيّز لمايكل فاسبيندر اللي شايفة إنه هايبقى إكتشاف المرحلة المقبلة، لكن علشان التناول اتغيّر المرة دي، شفنا صورة واخدة الطابع القديم فعلاً، قرّبنا من إنسانية الشخصيات أكتر، و بشكل عام الفيلم خرج بصورة حلوة و استحق إنه ياخد درجة حلوة..
7/10

6 –  Margin Call

للأمانة أنا مافهمتش كل حاجة متعلقة بالأزمة الإقتصادية، بس لما تلاقي فيلم اتصوّر كاملاً في سبعتاشر يوم، و فيه كاست مذهل زي ده : كيفين سبايسي، جيرمي آيرنز، ديمي مور، بول باتيني، و حبايبي الصغننين بتوع المسلسلات، كل دول في فيلم واحد أحداثه بتدور في يوم واحد ! لازم الفيلم يبقى مختلف..
المهم الفيلم نمطه سريع، كل إعتماده على الحوارات و دقتها و إنفعالات الممثلين كلهم.. و بصراحة كيفين سبايسي كان خطير كالعادة !
شابوه لمخرج الفيلم اللي جمع الناس دول و أخرج الفيلم ده بسرعة كده و طلعه بالمستوى العالي ده..
7/10

7 –  Jane Eyre

حبة رومانس بقى.. أنا كلاسيكية جداً و رواية جاين إير من الروايات المفضلة بالنسبة لي، مش بحب شخصية جاين نفسها زي ما بحب شخصية إدوارد روتشيستر ! أنا ضعيفة جداً قصاد اللي يبان صلب لدرجة الجليطة أحياناً، و هو في واقع الأمر إنسان متمرمط نفسياً و حالته صعبة !
مايكل فاسبيندر كان لطيف جداً في الدور ده، حنين كده و لذوذ مع القليل من الغلاسة .. ميا فيشكوفسكا كانت مناسبة للدور سناً و شكلاً و موضوعاَ لدرجة الملل..
بنفس رضيّة إديت الفيلم 7/10

8 –  Midnight in Paris 

في واقع الأمر أنا ليا فترة ماشفتش فيلم حلو لوودي آلان – بإستثناء فيكي كرستينا برشلونة – لدرجة إني ماكنتش ناوية أنزل الفيلم ده، لولا وجود ماريون كوتيار في الفيلم. أساسًا يعني جو باريس الساحر في أي فيلم صعب الواحد يتجاهله.. الفيلم جميل، مزيج من إكتشاف الذات في نوستالجيا لطيفة و رجوع لعصور خارقة، هيمنجواي / فيتزجيرالد / تي إس إليوت / جوجان / دالي / بيكاسو . و مزيكا ساحرة ! بصراحة الساوندتراكس بتاعت الفيلم فعلاً شدتني لدرجة إني قبل ما أقفل الفيلم كنت بأدوّر عليها !
و خللي علينا : 7/10

9 –  Crazy, Stupid, Love

طالما دخلنا على الرومانس يبقى ناخد حاجة رومانس على لايت كوميدي.. فيلم لطيف في المجمل، تقليدي جداً، شخصية ستيف كاريل فيه هي مزيج من شخصيته في Dan in the real world  على شوية من Date Night  .. و رايان جوسلينج – ده الفيلم التالت – كان زير النساء التقليدي جداً، مافيش تركيز حتى على حياته الشخصية غير في دقيقتين.. بس في المجمل هاتنبسط بالفيلم مع كوباية كاكاو / هوت تشوكلت / سحلب.. المهم إنك هاتقضي وقت مسلي و لطيف..
6/10

10 – Limitless 

 بصراحة أنا كنت محتارة في الكاتيجوري دي إني أختار بين ده و بين Source Code ، بس بما إن فكرة سورس كود اتقدمت قبل كده و بشكل إنساني أكتر و عجبني أكتر في Deja Vu  فكان ليمتليس هو اللي كفته أرجح .. برادلي كوبر كان لطيف، عامل شخصيتين الفيلم حلو جداً و حسيت إني لأول مرة أشوف الراجل ده بيمثل من غير الإعتماد التلقائي على وسامته !
فيلم مسلي برضه، جو الإثارة على الخيال العلمي على الشحط ده في المجمل لطيف ..
6/10

أخيراً ...
مش عارفة بقى ! فيه كذا فيلم صعبان عليا أقلشهم، فهاقولهم في المجمل كده : The Beaver  بائس شويتين، بس حلو .. Rio  ملوّن و غنائي و دمه خفيف .. و كمان Gnomeo& Juliet  كان مختلف كآنيميشن و عسول..

طبعًا لسه فيه أفلام مهمة نزلت في 2011 و لسه ما اتشافتش، إن شاء الله يبقى ليها تدوينة جديدة قريباً .....
 و كل سنة و إحنا بخير